ბრიტანეთის პრემიერ-მინისტრი, ტერეზა მეი თანამდებობიდან გადადგა. ამის შესახებ განცხადება, მან რამდენიმე წუთის წინ გააკეთა. მიზეზად ტერეზა მეი იმ გარემოებას ასახელებს, რომ ყველაფერი გააკეთა ბრექსიტის პროცესის სათანადოდ წარმართვისთვის, თუმცა წარმატებას ვერ მიაღწია.
ყველაფერი გავაკეთე იმისათვის, რომ დეპუტატებს ბრექსიტის გეგმისთვის მხარი დაეჭირათ. თუმცა, სამწუხაროდ ეს ვერ შევძელი. ჩემთვის დიდი პატივია, რომ ბრიტანეთის რიგით მეორე ქალი პრემიერ-მინისტრი ვიყავი, თუმცა, დარწმუნებული ვარ რომ არა უკანასკნელი,- განაცხადა ტერეზა მეიმ.
ევროკავშირიდან გასვლის გადაწყვეტილება ბრიტანეთმა, რეფერენდუმის გზით, 2016 წელს მიიღო. სწორედ ბრექსიტის კომპლექსური პროცესის სამართავად დაინიშნა პოსტზე ტერეზა მეი. 2 წლიანი მოლაპარაკებების და არაერთი კენჭისყრის მიუხედავად, პრემიერ-მინისტრმა ევროკავშირიდან გასვლის გეგმა, დათქმულ ვადაში ვერ შეათანხმა. დეპუტატების მხრიდან, იგი ბოლო რამდენიმე თვის განმავლობაში, არაერთხელ ისმენდა მოთხოვნას მისი გადადგომის შესახებ. სწორედ წარუმატებელი ბრექსიტის გეგმა გახდა ტერეზა მეის წასვლის მიზეზი.
