„ქართული ოცნების“ ცენტრალურ ოფისში საპარლამენტო უმრავლესობის შეხვედრა გაიმართა. შეკრების დასრულების შემდეგ საპარლამენტო უმრავლესობის ლიდერმა არჩილ თალაკვაძემ განაცხადა, რომ მმართველმა გუნდმა შუალედური არჩევნების შედეგები შეაჯამებასთან ერთად  სამომავლო გეგმებზეც იმსჯელა.

„შევთანხმდით, რომ შევინარჩუნებთ აქტიურ ტემპს და კომუნიკაციას საზოგადოებასთან ისე, როგორც ეს იყო წინასაარჩევნო პერიოდში და ძალიან ბევრ საკითხს უმოკლეს დროში გადავუჭრით ჩვენს თანამოქალაქეებს“, - აღნიშნა საპარლამენტო უმრავლესობის ლიდერმა.  

თალაკვაძის თქმით ძირითადი აქცენტები გაკეთდება განათლების რეფორმასა და რეგიონებში ინვესტიციებზე.  

ასევე, დაწყებულია მუშაობა ახალ პოლიტიკურ პროგრამაზე და მიმდინარეობს კონსულტაციები, რომლის შედეგადაც „ქართული ოცნება“ განახლებული პოლიტიკური პროგრამით წარდგება საზოგადოების წინაშე. 

„ჩვენ 2020 წლის არჩევნებს კიდევ უფრო ძლიერი პოზიციებით შევხვდებით“, - თქვა არჩილ თალაკვაძემ.

რაც შეეხება ოპოზიციის ბრალდებებს, რომ არჩევნები დემოკრატიისთვის მიუღებელი მეთოდებით ჩატარდა, თალაკვაძემ თქვა, რომ ოპოზიციის მიზანი იყო არჩევნების დისკრედიტაცია, რადგან ხედავდნენ, რომ მარცხდებოდნენ.

მთაწმინდის საარჩევნო ოლქის ყველა უბნის შედეგები დათვლილია. ცენტრალური საარჩევნო კომისიის ვებგვერდზე საბოლოო შემაჯამებელი ოქმების ატვირთვა დასრულდა. ყველა უბანზე „ქართული ოცნების“ კანდიდატმა ლადო კახაძემ გაიმარჯვა. მას ამომრჩეველთა 61.83%-მა დაუჭირა მხარი, შალვა შავგულიძეს კი 38.17%-მა.