მიეჩვიეთ სიმართლის მოსმენას, - ამ ფრაზით პრემიერ-მინისტრმა მამუკა ბახტაძემ ჟურნალისტებს რამდენჯერმე მიმართა, როცა მედიის მიერ ლარის კურსთან დაკავშირებით დასმულ კითხვებს პასუხობდა.
მთავრობის მეთაურის შეფასებით, ეროვნულ ბანკს აქვს ყველანაირი მექანიზმი იმისთვის, რომ პრინციპული ნაბიჯები გადადგას.
„მიეჩვიეთ სიმართლის მოსმენას! ხელისუფლების პასუხისმგებლობა არის ის, რომ მსგავსი პრობლემები მოაგვაროს დროულად, მოახდინოს მათი პროგნოზირება და მათი პრევენცია. ძალიან გთხოვთ, მიეჩვიეთ სიმართლის მოსმენას! რაც შეეხება კურსს - ანალიზი აჩვენებს და გასულ კვირას ეროვნული ბანკის მიერ გადადგმულმა ნაბიჯებმა კიდევ ერთხელ დაადასტურა, რომ ეკონომიკაში მიმდინარე პროცესები არის ჯანსაღი. შესაბამისად, ასეთ ვითარებაში ეროვნულ ბანკს აქვს ყველა საშუალება და მექანიზმი იმისთვის, რომ გადადგას პრინციპული ნაბიჯები.
რა თქმა უნდა, ის არის დამოუკიდებელი სტრუქტურა და თვითონ უნდა მიიღოს გადაწყვეტილებები, მაგრამ კიდევ ერთხელ მსურს გავიმეორო, რომ გასული კვირის მოვლენებმა კიდევ ერთხელ დაადასტურა, რომ ეკონომიკაში მიმდინარე მოვლენები არის ჯანსაღი, მოლოდინები, მათ შორის ლარის გაუფასურებასთან დაკავშირებით იყო გადაჭარბებული. ეროვნულ ბანკს აქვს საშუალება გადადგას პრინციპული ნაბიჯები და ყველანაირი მექანიზმი აქვს ამისთვის," - განაცხადა მამუკა ბახტაძემ.
