ამ წუთისთვის ყველაფერი გათიშულია, პირდაპირი ეთერი არის შეუძლებელი და ვცდილობთ სარეზერვო რესურსებით გავიდეთ ეთერში. ამის შესახებ "ტვ პირველის" აღმასრულებელმა დირექტორმა ნანა აბურჯანიძემ "ინტერპრესნიუსთან" საუბრისას განაცხადა.
მისივე განმარტებით, ისინი "ტვ პირველზე" განხორციელებულ კიბერშეტევას რაიმე კონკრეტულ ფაქტსა და მოვლენას არ უკავშირებენ.
"ეს არის ჩვენ სერვერზე განხორციელებული კიბერშეტევა. სერვერი ძლიერ დავირუსდა. ახლა ვცდილობთ გავერკვეთ სიტუაციაში. შინაგან საქმეთა სამინისტროდანაც მოსულია ძალიან დიდი ჯგუფი და მათთან ერთად შევეცდებით მოვახდინოთ დიაგნოსტიკა, რა ტიპის შეტევა იყო და რა შედეგები შეიძლება დადგეს. ამ წუთისთვის ყველაფერი გათიშულია, პირდაპირი ეთერი არის შეუძლებელი და ვცდილობთ სარეზერვო რესურსებით გავიდეთ ეთერში. ჩვენ ინტენსიურად ვმუშაობთ, რომ მაუწყებლობის აღდგენა შევძლოთ“, - განაცხადა ნანა აბურჯანიძემ.
