დღეს დილით სტალინის საზოგადოების წარმომადგენლები ქალაქის ადმინისტრაციული შენობის წინ შეიკრიბნენ და ადგილობრივ ხელისუფლებას სტალინის ძეგლის დაუყოვნებლივ დადგმის ნებართვა მოსთხოვეს.
შეკრებილ საზოგადოებას ქალაქის მერი ზურაბ ჯირკველიშვილი შეხვდა და მათი წარმომადგენლები მოსალაპარაკებლად მერიაში მიიწვია.
შეხვედრა მერის კაბინეტში შედგა. შეხვედრაზე იმყოფებოდნენ საზოგადოება «სტალინის» თავმჯდომარე გრიშა ონიანი, პარტია „ნეიტრალური საქართველოს“ თავმჯდომარე ვალერი კვარაცხელია, “სტალინის იდეურ მემკვიდრეთა” საზოგადოების წევრი ალექსანდრე ლურსმანაშვილი, "სტალინის ფონდის“ თავმჯდომარე თამაზ ჯაფოშვილი, ორგანიზაცია “გორელების” წევრები ზურაბ წკრიალაშვილი, გიორგი კანდელაკი, ვალერი სუხიშვილი და სხვები. 
შეხვედრაზე ისაუბრეს ძეგლის დადგმასთან დაკავშირებულ პრობლემებზე. 
საზოგადოების მოთხოვნით შეხვედრას მოგვიანებით შეუერთდა საკრებულოს თავმჯდომარე პაპუნა კობერიძეც. 
"ჩვენ არ გავქვს უფლება, მივიღოთ სამართლებრივად არასწორი გადაწყვეტილება. თუ საინიციატივო ჯგუფი მოითხოვს და წარმოადგენს ყველა საჭირო დოკუმენტს სტალინის ძეგლის დადგმასთან დაკავშირებით, ამ საკითხს ყველა პროცესუალური ნორმების დაცვით გავიტანთ საკრებულოს სხდომაზე, სადაც ხალხის ნდობით აღჭურვილმა საკრებულოს წევრებმა უნდა მიიღონ გადაწყვეტილება. უახლოესი საკრებულო 2 ოქტომბერს გაიმართება, სადაც შესაძლებელი იქნება აღნიშნული საკითხის განხილვა.“ - განაცხადეს ქალაქის პირველმა პირებმა.