"ივანიშვილის რეჟიმი პორნო-სკანდალით  არის დაკავებული და არ აინტერესებთ აქ რა ხდება"-ეს განცხადება ლეიბორისტული პარტიის ლიდერმა შალვა ნათელაშვილმა სოფელ ჯარიაშენში საოკუპაციო ხაზთან არსებული მდგომარეობის გაცნობის შემდეგ გააკეთა. ის საქართველოს მინისტრთა კაბინეტის წევრებს ჯარიაშენში ჩასვლისაკენ მოუწოდებს და გაეროს უშიშროების საბჭოს მოწვევას სთხოვს. ნათელაშვილი ხელისუფლებას ასევე მიმართავს და სთხოვს, რომ დაუყოვნებლივ აღიძრას სისხლის სამართლის საქმე რუსეთის მთავრობის ლიდერების წინააღმდეგ. საოკუპაციო ხაზთან არსებულ ვითარებას რაც შეეხება "დია"-ს კორესპონდეტის ცნობით, ამ მომენტისთვის გზის მშენებლობის სამუშაოები შეჩერებულია და ტერიტორიაზე რუსი ოკუპანტები აღარ იმყოფებიან. ცნობისთვის, სოფელ ჯარიაშენში რუსი ოკუპანტები მძიმე ტექნიკით ორი დღის წინ გამოჩნდნენ, მათ ჯარიაშენელების ბაღბში ნარგავების გაჩეხვა და გზის მშენებლობა დაიწყეს. ადგილობრივების ინფორმაციით, თუ გზის მშენებლობის დასრულების შემდეგ ოკუპანტი სახელმწიფოს წარმომადგენლები მავთულხლართების გავლებას დაიწყებენ სოფელი 30 ჰექტარ მიწის ფართობზე მეტს დაკარგავს. 

თამარ ადვაძე ტელეკომპანია "დია" 13.03.2016