კომბინატის დასახლებაში, მოსკოვის ქუჩაზე მცხოვრები ბიჭის მიმართვა "დიას" ეთერში გასვლისთანავე საზოგადოების ყურადღების ცენტრში მოექცა. 10 წლის გიგა ტალახაძემ ქალაქის მერს მიმართა და სკვერის მოწყობა სთხოვა. როგორც ჩანს ბიჭის თხოვნა, ზურაბ ჯირკველიშვილმა მოისმინა და მისი მონახულება გადაწყვიტა. მერიის პრესსამსახურის ცნობით, ჯირკველიშვილი გიგას ინიციატივას დეტალურად გაეცნო. პატარა გიგამ მერს ის ადგილი დაათვალიერებინა, სადაც სკვერის მოწყობას ითხოვს.  "სკვერს რომ გაგვიკეთებთ, დიდი ასოებით გიგას სკვერი დააწერეთ რა! “ - მიმართა გიგამ მერს. 

"მოსკოვის ქუჩის კეთილმოწყობას ჩვენ 2016 წლისთვის ვვარაუდობდით, მაგრამ დევნილთათვის საცხოვრებელი კორპუსების მშენებლობის წამოწყებამ ჩვენი გეგმები 1 წლით გადასწია. აქ ახლა მძიმე ტექნიკა მუშაობს და არ იქნება მიზანშეწონილი ტერიტორიის მოწყობის სამუშაოები განვახორციელოთ, რადგან, ძალიან დიდი ალბათობით, შესაძლებელია მძიმე ტექნიკის გადაადგილებამ არა თუ ასფალტის საფარი, არამედ მიწისქვეშა კომუნიკაციებიც დააზიანოს და ტერიტორია ხელახლა სარეაბილიტაციო გახდეს. მე გპირდებით, როგორც კი კორპუსების მშენებლობა დასრულდება, ჩვენ დავიწყებთ ქუჩის რეაბილიტაციას თავისი ტროტუარებით, მინისტადიონითა და დასასვენებელი სკვერით.“- განუცხადა ზურაბ ჯირკველიშვილმა მოსკოვის ქუჩის მცხოვრებლებს. 
მოსკოვის ქუჩა კომბინატის დასახლების ერთ-ერთი ყველაზე ამორტიზებული ქუჩაა, რომლის სიგრძე 820 მეტრია. ქუჩის მიმდებარედ, დაახლოებით 2500 კვადრატული მეტრის თავისუფალი ფართი კი ნაგავსაყრელადაა ქცეული.