საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე დიდი ბრიტანეთისა და ჩრდილოეთ ირლანდიის გაერთიანებული სამეფოს 160-ე ბრიგადის მეთაურს, მარტინ გემბლს შეხვდა. შეხვედრაზე მხარეებმა სამომავლო თანამშრომლობის საკითხები განიხილეს. ასევე ისაუბრეს უელსში გამართულ „ქვეით საველე სასროლო ბანაკის“ სწავლებაში ქართველი სამხედროების მონაწილეობის საკითხზე. აღნიშნული სწავლება, სწორედ, უელსის 160-ე ბრიგადის მე-6 ქვეითი ბატალიონის ორგანიზებით ჩატარდა. ბრიგადის მეთაურმა წვრთნაში მონაწილე ქართველი სამხედროები მაღალ დონეზე შეაფასა. გენერალ-მაიორმა ვახტანგ კაპანაძემ კი აღნიშნა, რომ მსგავს სწავლებებში მონაწილეობა საქართველოს შეიარაღებულ ძალებს საშუალებას აძლევს, პარტნიორი ქვეყნების გამოცდილება გაიზიაროს და საბრძოლო, მომზადების კუთხით სიახლეები დანერგოს. შეხვედრის ფარგლებში მხარეებმა ბრიტანელი სამხედროების საჩხერის სამთო მომზადების სკოლის ბაზაზე დაგეგმილ სწავლებებში მონაწილეობის საკითხიც განიხილეს.