აშშ-ის სახელმწიფო დეპარტამენტმა ჯონ კერის საქართველოში ვიზიტი ოფიციალურად დაადასტურა. აშშ-ის სახელმწიფო მდივანი საქართველოში 6 ივლისს ჩამოვა. ჯონ კერი შეხვდება საქართველოს პრემიერ-მინისტრს და ორმხრივ დისკუსიებს გამართავს საკითხების ფართო სპექტრზე, მათ შორის: აშშ-ის მხრიდან საქართველოს ევროატლანტიკური მისწრაფებების მხარდაჭერასა და ოქტომბრის არჩევნების წარმატებით ჩატარების მნიშვნელობაზე. ასევე, გაიმართება აშშ-საქართველოს სტრატეგიული პარტნიორობის კომისიის პლენარული შეხვედრა, რომლის თანათავმჯდომარე სახელმწიფო მდივანი იქნება, ის ასევე გამართავს შეხვედრებს საქართველოს პრეზიდენტთან და ქართული ოპოზიციური პარტიების ლიდერებთან. საქართველოში ვიზიტის შემდეგ, ჯონ კერი უკრაინაში გაემგზავრება, სადაც ქვეყნის პრეზიდენტს, პრემიერ-მინისტრსა და სხვა ლიდერებს შეხვდება, ამის შემდეგ კი ვარშავას ეწვევა, სადაც ნატო-ს სამიტს დაესწრება.