ქვორუმის არარსებობის გამო გადადებული ქალაქ გორის საკრებულოს სხდომა დღეს ხმაურით გაგრძელდა. საკრებულოს წევრებს ერთ საკითხზე, გორის საცურაო აუზის ეკონომიკის სამინისტროსთვის გადაცემის საკითხზე უკვე მესამედ უნდა ემსჯელათ, თუმცა გორის მერიამ საკითხი დაზუსტებელი დეტალების არსებობის მოტივით უკან გაითხოვა. ამ ქმედებას საკრებულოს წევრთა ერთ ნაწილში პროტესტი მოჰყვა. ისინი მიიჩნევდნენ, რომ ვინაიდან გორის საცურაო აუზის საკითხი საკრებულოს მსჯელობის საგანი მესამედ გახდა, იყო ალბათობა, რომ მათ კონკრეტული გადაწყვეტილება მიეღოთ, რაც მერიას დააზარალებდა. შეგახსენებთ, გორის საცურაო აუზის თემა მას შემდეგ გახდა აქტუალური, რაც კერძო მფლობელებმა მისი დაბრუნების მოთხოვნით სამართალდამცავ ორგანოებს მიმართეს და გორის საკრებულოს პროკურატურამ დაავალა დაიწყოს პროცედურა აუზის გია გიგუაშვილის ოჯახისთვის გადაცემის უზრუნველსაყოფად.
| 
