საქართველო  გაეროს მსოფლიო ტურიზმის ორგანიზაციის ღვინის ტურიზმის პირველ საერთაშორისო კონფერენციას მასპინძლობს. კონფერენციის გახსნასთან დაკავშირებულ საზეიმო მიღებას საქართველოს პრემიერ-მინისტრი გიორგი კვირიკაშვილი დაესწრო. საქართველოს მთავრობის მეთაურმა მადლობა გადაუხადა გაეროს მსოფლიო ტურიზმის ორგანიზაციის გენერალურ მდივანს ღონისძიების ჩატარების ადგილად საქართველოს შერჩევისთვის და თანამშრომლობის გაღრმავების იმედი გამოთქვა. გიორგი კვირიკაშვილმა ხაზი გაუსვა, რომ საქართველოში არსებობს ღვინის დაყენების უნიკალური ტრადიციული მეთოდები, მათ შორის ქვევრის მეთოდი, რაც აღიარებულია იუნესკოს მიერ და შეტანილია კაცობრიობის არამატერიალური კულტურული მემკვიდრეობის სიაში.