თბილისის მასშტაბით ათ სამედიცინო დაწესებულებაში ინფექციების კონტროლს მონიტორთა ჯგუფები განმეორებით აფასებენ. პირველ ეტაპზე, კონტროლი ამ მიმართულებით თბილისის 10 კლინიკაში, 6 თვის წინ განხორციელდა, რის შემდეგაც დაწესებულებებს შესასრულებელი მოთხოვნები წარედგინათ. ამ ეტაპზე კი გაცემული რეკომენდაციების შესრულება ფასდება. თითოეულ კლინიკაში განმეორებითი მონიტორინგი ორ დღეს გაგრძელდება, შემოწმება ოქტომბრის ბოლოს ათივე სამედიცინო დაწესებულებაში დასრულდება, რის შემდეგაც შედეგები დამუშავდება და 10 ნოემბრისთვის ანალიზი მომზადდება. შედეგების ანალიზის საფუძველზე რეკომენდაციები გაიცემა და კლინიკებს შესასრულებლად მიეწოდება.

ინფექციების კონტროლის მიმართულებით, ჯანდაცვის სამინისტროს მონიტორთა ჯგუფი სტაციონარული დაწესებულების გარემოს, დაწესებულების შენობის მდგომარეობას, ეზოს სისუფთავეს, სამედიცინო ნარჩენების მენეჯმენტს, წყალმომარაგების სისტემას, სათავსების სისუფთავეს, თეთრეულისა და საწოლის აღჭურვილობის რეცხვის მიმართულებით არსებულ მდგომარეობას აფასებს. ინფექციების კონტროლის სისტემის შეფასება კი დეზინფექცია-სტერილიზაციის, ხელების ჰიგიენის, პერსონალის ჯანმრთელობის, უსაფრთხო ინექციების პრაქტიკისა და ანტიბიოტიკების გამოყენების პოლიტიკის მიმართულებით ხდება.

თბილისის შემდეგ, ნოემბრიდან ინფექციების კონტროლის მონიტორინგის პირველი ეტაპი რეგიონებში დაიწყება. საქართველოს მასშტაბით, მონიტორები 35 სამედიცინო დაწესებულებას შეამოწმებენ.

მონიტორინგის განმეორებით პროცესს ჯანდაცვის მინისტრის მოადგილე ინგოროყვას კლინიკაში დააკვირდა.