„ეროვნული ფორუმის“ გორის რაიონის მაჟორიტარი დეპუტატობის კანდიდატმა მოსახლეობასთან წინასაარჩევნო შეხვედრები დაასრულა. სოსო ვახტანგაშვილმა ბოლო შეხვედრა მეჯვრისხევში გამართა. მან ადგილზე მოისმინა ის პრობლემები, რომლებიც მოსახლეობის წინაშე დღემდე მწვავედ დგას. შეკრებილებმა მაჟორიტარობის კანდიდატს ერთ-ერთ მთავარ პრობლემად დაუსახელეს ის, რომ სოფლის ყოფილი გამგებელი ტარიელ გურგენიძე დღემდე ციხეშია და მისი გათვისუფლება ვერ ხერხდება. ვახტანგაშვილის განცხადებით, იმ შემთხვევაში, თუ მოსახლეობა ნდობას კიდევ ერთხელ გამოუცხადებს და მაჟორიტარი დეპუტატის მანდატს კიდევ ერთხელ მოიპოვებს, სოფელ მეჯვრისხევში შიდა გზების და სასმელი წყლის სისტემის რეაბილიტაცია დაიწყება. მან ასევე განაცხადა, რომ ხელს შეუწყობს ტარიელ გურგენიძის ციხიდან გათავისუფლების პროცესს.