ეროვნული ბიბლიოთეკის დირექტორი გიორგი კეკელიძე ფეისბუკის გვერდზე წერს, რომ ეროვნულ ბიბლიოთეკაში უახლოეს მომავალში კარტოგრაფიის მუზეუმ-კაბინეტი გაიხსნება, სადაც საუკუნეების განმავლობაში შექმნილი საქართველოს რუკები იქნება გამოფენილი. "ეროვნული ბიბლიოთეკა პუტინის ინტერპრეტაციის კვალად, ძალიან მალე გახსნის კარტოგრაფიის მუზეუმ-კაბინეტს, სადაც საუკუნეების განმავლობაში შექმნილი საქართველოს რუკები იქნება წარმოდგენილი - მათ შორის პირდაპირ თუ ირიბად რუსეთის მიერ დადასტურებული. ამ კაბინეტში მოვიწვევთ ელჩებს საქართველოში და მოვიყვანთ ყველა უცხოელ სტუმარს. ამავდროულად შეიქმნა კაბინეტის ელექტრონული ვერსიაც". 9 ივლისს, როდესაც რუსეთის პრეზიდენტმა ვლადიმერ პუტინმა უარი თქვა საქართველოსთვის ახალი სანქციების დაწესებაზე ჟურნალისტებს საქართველოს ისტორიის შესახებ თავისი ინტერპრეტირებული ვერსია უამბო გაყალბებული თარიღებითა და ფაქტებით. მან თქვა, რომ 18-ე საუკუნის ბოლოსა და 19-ე საუკუნის დასაწყისში ოსეთი და აფხაზეთი დამოუკიდებელ ერთეულებად შევიდნენ რუსეთის იმპერიის შემადგენლობაში. მოგვიანებით მოვლენები მიმდინარეობდა ერთიანი სახელმწიფოს ჩარჩოებში - ოსეთის სამხრეთი ნაწილი შევიდა ტიფლისის გუბერნიის შემადგენლობაში. აფხაზეთი ვითარდებოდა შემდეგნაირად: როდესაც ინგრეოდა რუსეთის იმპერია, პირველი მსოფლიო ომის შემდეგ, საქართველომ სცადა აფხაზეთის გადაყლაპვა. შეიქმნა საქართველოს დამოუკიდებელი სახელმწიფო და გერმანიის ჯარების დახმარებით 1918 წელს საქართველომ მოახდინა აფხაზეთის ოკუპაცია.
|