პანკისში ჩატარებული სპეცოპერაციისას დაღუპული თემირლან მაჩალიკაშვილის მამას, მალხაზ მაჩალიკაშვილს პარლამენტის შენობის წინკარვის დადგმა ისევ სურს, თუმცა პოლიცია ამის საშუალებას არ აძლევს.
როგორც პარლამენტთან მყოფმა, საპატრულო პოლიციის მთავარი სამმართველოს უფროსმამ კახა ბუხრაძემ მაჩალიკაშვილს განუცხადა, „ამ ეტაპზე მიზანშეუწონლად მიაჩნიათ კარვის დადგმა, ვინაიდან, აღნიშნულ ადგილზე სარეაბილიტაციო სამუშაოები იგეგმება“.
კითხვაზე, იმ შემთხვევაში, თუკი, მაჩალიკაშვილი კარავს მაინც დადგამს, რა იქნება საპატრულო პოლიციის სამოქმედო გეგმა, პოლიციელი აცხადებს, რომ „სიტუაციიდან გამომდინარე იმოქმედებენ“.
თავის მხრივ, მალხაზ მაჩალიკაშვილი აცხადებს, რომ ის კარავს დადგამს.
„ვაპირებ კარვის დადგმას, პატარა კარავია. 11 თვის განმავლობაში ჩემი აქცია არ შეწყვეტილა დღე და ღამე. მითხარით, რატომ მოკალით ჩემი შვილი, თუ მოკალით, დამნაშავე იყო თუ არა? თუ იყო, დამიდეთ რამე ფაქტი, თუ არ იყო, აღიარეთ სახელმწიფომ დანაშაული. შიგნით საუბრობენ იმაზე, დიახ, ჩვენ დავაშავეთ, ეს იყო შეცდომა და მაჩალიკაშვილთან მოლაპარაკება უნდა შედგესო. არავითარი მოლაპარაკება არ შედგება, სანამ არ იტყვიან, რომ მძინარე ბავშვი მოკლეს, რომ ამ დანაშაულის „გასაპრავებლად“ ის ბავშვი ტერორისტად გამოვაცხადეთო. ამას ვითხოვ 429 დღე-ღამეა. აქ რაც გამოვიარე, არავის ვუსურვებ“, - განაცხადა მაჩალიკაშვილმა.
შეგახსენებთ, რომ მალხაზ მაჩალიკაშვილს პარლამენტთან კარავი ბოლო რამდენიმე თვის განმავლობაში ჰქონდა გაშლილი, თუმცა 20-21 ივნისის მოვლენების შემდეგ და იმის გათვალისწინებით, რომ პარლამენტთან შს მინისტრის გადადგომის მოთხოვნით აქციები მიმდინარეობს, კარვის დროებით აღების გადაწყვეტილება მიიღო.
