„უტვინო გავრილოვზე აგორებულმა პროვოკაციამ ქვეყანას უდიდესი ზარალი მოუტანა“ - ამის შესახებ ლევან ვასაძემ სოციალურ ქსელში, ვიდეო-მიმართვაში განაცხადა. ლევან ვასაძემ ქართული მედია მავნებლად მოიხსენია. „ის ტელეტერორიზმი, რომელშიც გადავარდნილი არის ე.წ თავისუფალი და სინამდვილეში ლიბერალური ქართული ტელევიზია, არის უაღრესად მავნებელი ჩვენი ქვეყნისათვის, ეკონომიკისათვის. დათვლილია უკვე, რომ გასული კვირების მოვლენებმა, არშემდგარმა სახელმწიფო გადატრიალებამ და ამის შედეგად უტვინო დეპუტატი სერგეი გავრილოვის მონაწილეობით, ჩვენი მედიის მიერ აგორებულმა პროვოკაციამ და არეულობამ გამოიღო ქვეყნისთვის უმძიმესი შედეგი...“ - განაცხადა ლევან ვასაძემ. შეგახსენებთ, 20 ივნისს, საქართველოში იმყოფებოდა რუსი დეპუტატი სერგეი გავრილოვი, რომელმაც საქართველოს პარლამენტში, სპიკერატის ტრიბუნიდან ქართველ კოლეგებს რუსულად მიმართა. რასაც მწვავე პროტესტი მოჰყვა. პარლამენტში დაწყებული პროტესტი იმავე დღის საღამოს რუსთაველის გამზირზე გაგრძელდა. აქციის მონაწილეებმა პარლამენტში შეჭრა სცადეს, რა დროსაც სპეცრაზმმა ცრემლსადენი გაზი და რეზინის ტყვიები გამოიყენა. დაშავდა 240 ადამიანი. აქციის მონაწილეები დღემდე მოითხოვენ, რომ თანამდებობა დატოვოს შინაგან საქმეთა მინისტრმა, გიორგი გახარიამ. პარალელურად 20 ივნისის მოვლენებზე მიმდინარეობს გამოძიება. ძალის გადამეტების ბრალდებით, უფლებამოსილება შეუჩერდა რამდენიმე სამართალდამცველს. ჯგუფური ძალადობის ბრალდებით დააკავეს ირაკლი ოქრუაშვილი, მანამდე ნიკა მელია, რომელიც სასამართლომ გირაოს სანაცვლოდ გაათავისუფლა.
|