24 წლის მასწავლებელი, რომელიც ქუთაისში მეეზოვედ მუშაობს

ირინე გიგაშვილი 24 წლისაა. ის პროფესიით პედაგოგია, თუმცა იმის გამო, რომ ამ ეტაპზე სამსახური ვერ იპოვა, უკვე 2 წელია ქუთაისის სისუფთავაზე ზრუნავს.

პროფესიის პედაგოგი ახალგაზრდა ქალი ამბობს, რომ შეუფერებელი და სამარცხვინო სამსახურები არ არსებობს. დილით და საღამოს ქალაქს ასუფთავებს, შუალედში კი, დამატებით სხვა სამსახურში მიიჩქარის.

„დილის 6-ის ნახევარიდან 9-ის ნახევრამდე ვასუფთავებ ქუჩებს. ამის შემდეგ მივდივარ სხვა სამსახურში, შემდეგ უკვე იქედან მოვდივარ და საღამოს 6 საათზე ისევ ვიწყებ ქუჩების დაგვას და და ვასრულებ 9 საათზე. თუ კი ვერ შევძელი დროულად ქუჩის დასუფთავება, რადგან ძალიან არის დანაგვიანებული პერიმეტრი, მაშინ დრო უფრო ხანგრძლივდება, ყოფილა შემთხვევები, რომ ღამის 11 საათამდე დამიგვავს ქუჩები.", - თქვა „პრაიმტაიმთან" ირინე გიგაშვილმა.

ახალგაზრდა ქალი ამბობს, რომ საქმე შრომატევადია, თუმცა შეუძლებელი არაფერია.

„ძალიან შრომატევადია საქმეა, ქარიან ამინდში განსაკუთებით გვიჭირს სისუფთავის შენარჩუნება, რადგან ურნებიდან ბევრი ნაგავი ცვივა და ქუჩებშია მიმოფანტული. ქუთაისში ურნებს თავსახური არ აქვს და შესაბამისად ქალაქი ძალიან ბინძურდება. განსაკუთრებით ტრანსპორტით მოსარგებლეები აბინძურებენ ქალაქს. წვიმაში და ქარშიც ვმუშაობთ, მაგრამ განსაკუთრებით რთული სიცხეში მუშაობაა. როდესაც მზე გაჭერს, სხეული გადახურებულია და შენ მაინც მოძრაობაში ხარ. წვიმა იმდენად არ არის შემაწუხებელი, როგორც მზე. ჩემი საქმე რთულია, მაგრამ შეუძლებელია არაფერია.",- ამბობს ირინე.

მეეზოვის თქმით, ოჯახი თავდაპირველად წინააღმდეგი იყო მის მიერ ქუჩის დაგვის, თუმცა შემდეგ მისთვის წინააღმდეგობა არ გაუწევიათ.

„როდესაც დავოჯახდი, ჩვენი ოჯახის ხარჯები ძალიან გაიზარდა და აქედან გამომდინარე საჭირო იყო, რომ მეუღლესთან ერთად მემუშავა. შვილიც შემეძინა და შემოსავალი, გასავალს ასწრებდა. ჩემი მეუღლის ბებო, მეეზოვედ მუშაობდა და ვიცოდი რა გრაფიკი ჰქონდა. როცა დროის ფასი იცი, მშვენიერი სამსახურია, დილით ადრე ვასრულებ ჩემს საქმეს და მერე გვიან საღამოს. შუალედში კი სხვა სამსახურში გავრბივარ. სილამაზის და ესთეტიკის ცენტრში სანიტრის პოზიციაზე ვმუშაობ."

ოჯახისგან განსხვავებით, ახალგაზრდა ქალი ამბობს, რომ საზოგადოებას არაერთგვაროვანი დამოკიდებულება აქვს.

„ძირითადი შემთხვევები არის, რომ ეცოდები. თუმცა საბედნიეროდ ნათესავების და ოჯახის წევრების მხრიდან ეს ასე არ ყოფილა. ჩემთან მიმართებაში დადებითი დამოკიდებულებები იყო. არის უსიამოვნო ფაქტებიც, ერთხელ ქუჩას ვგვიდი და ამ დროს ქალმა და ბავშვმა ჩაიარა და ქალბატონმა უთხრა მის შვილს თუ არ ისწავლი შენც ასე მოგიწევსო."

24 წლის ქალმა, უნივერსიტეტი ორი წლის წინ დაასრულა და ის პროფესიით პედაგოგია.

„დაწყებითების პედაგოგი ვარ განათლებით, ამ ეტაპზე პროფესიით სამსახური ვერ ვიპოვე. გადამზადებები მაქვს გასავლელი, გარკვეული გამოცდა კიდევ უნდა ჩავაბარო, თუმცა ვოცნებობ პედაგოგობაზე."

პედაგოგის თქმით, თუ მას სკოლაში მუშაობის საშუალება ექნება, ის ბავშვებს ქუჩაში ქცევის წესებსაც ასწავლის.

„პირველ რიგში იმას, რომ ქუჩაში ნაგავი არ უნდა დაყარონ. ასევე იმას, რომ შრომა არასოდეს არის სირცხვილი. არ არსებობს შეუფერებელი და სამარცხვინო სამსახურები. როდესაც თანხა გჭირდება, ყველა ღირსეულ სამსახურს უნდა დათანხმდე. შეიძლება ჩვენს ცხოვრებაში იყოს ისეთი დღეები, როცა რთული პერიოდი გვიდგას, მაგრამ გამორიცხულია რომ შრომით უკეთესობა არ მოიპოვო. დღეში მე მეეზოვებით 11 ლარს ვიღებ." - ამბობს ირინე გიგაშვილი.

წყარო: პრაიმტაიმი

დეკემბერი 2019
ორშ.სამშ.ოთხშ.ხუთშ.პარას. შაბათიკვირა
2526272829301
2345678
9101112131415
16171819202122
23242526272829
303112345