გორი  რიოს ოლიმპიადაზე წარმოდგენილი სპორტსმენების საგულშემატკივროდ ემზადება. ქალაქში უკვე გამოჩნდა გორელი სპორტსმენების ბილბორდი და ფანკლუბი "მოგვერდი“ შეიქმნა, რომელმაც დღეს  საგანგებო ფოტოსესია გამართა. ფოტოსესია გორის ბავშვთა და ახალგაზრდობის ცენტრში 12:00 დაიწყო და საღამომდე გაგრძელდა,  რა დროსაც ნებისმიერ მსურველს შესაძლებლობა ჰქონდა  ფოტოები გადაეღო საგანგებოდ დამზადებულ მაისურებში და თანაქალაქელი სპორტსმენების მხარდაჭერა დაეფიქსირებინა. ფოტოსესია ფანკლუბ "მოგვერდის“ პირველი აქტივობა იყო. კლუბის ორგანიზატორები მთელი ოლიმპიადის მანძილზე არაერთი საინტერესო ღონისძიების გამართვას გეგმავენ.  რიოს ოლიმპიადის მიმართ გორელების ინტერესი წელს განსაკუთრებით მაღალია, რადგან საქართველოს ეროვნული ნაკრების გამარჯვებისთვის 39 სპორტსმენს შორის გორის საჭიდაო სკოლებში აღზრდილი 5 მოჭიდავე - ვაჟა მარგველაშვილი, ლაშა შავდათუაშვილი, ბექა ღვინიაშვილი, ლადო ხინჩეგაშვილი და გენო პეტრიაშვილი იბრძოლებს. რიოს ოლიმპიურ სოფელში საქართველოს დროშის აღმართვის ცერემონიალი დაგეგმილია 2 აგვისტოს, გახსნის ცერემონიალი კი 5 აგვისტოს სტადიონ “მარაკანაზე” ჩატარდება.