ჩვენს ეთერში გასულ სიუჟეტს რეაგირება მოჰყვა-ხაშურში  რკინიგზის სადგურის მიმდებარედ მიწისქვეშა გადასასვლელის სარეაბილიტაციო სამუშაოები დაიწყო. ძნელაძის ქუჩაზე არსებული გადასასვლელი ქალაქის ორ ნაწილს, რომელსაც რკინიგზა ჰყოფს, ერთმანეთთან აკავშირებს.  როგორც გამგეობაში აცხადებენ, გადასვლელის მოუწესრიგებლობა მოსახლეობის სიცოცხლისთვის საფრთხეს წარმოადგენს.  პროექტის ფარგლებში დაგეგმილია გადასასვლელის სრული რეაბილიტაცია, დამონტაჟდება განათების სისტემა, დაიგება ახალი ქვის ფილები კიბის საფეხურებზე და მოეწყობა სანიაღვრე სისტემა. მრავალი წლების  მანძილზე მიწისქვეშა გადასასვლელი მოუწესრიგებელი იყო. მოქალაქეთა უმრავლესობა ქალაქის ერთი ნაწილიდან მეორეში გადაადგილებას რკინიგზის ლიანდაგის გადაკვეთით ახერხებდა, რაც საფრთხეს უქმნიდა მათ სიცოცხლეს. მიწისქვეშა გადასასვლელის რეაბილიტაცია ხაშურის მუნიციპალიტეტის გამგეობის მხარდაჭერით ხორციელდება. სამუშაოები 2016 წლის ოქტომბერში დასრულდება და მისი ღირებულება 74 876 ლარს შეადგენს.